ئەلا مۇلازىمىتىڭىز ئارقىلىق خېرىدارنى تۇتۇپ قېلىڭ

مەنبە: uycnr

تەھرىر: ablatjan

يوللانغان ۋاقتى: 2016-03-14 12:02:26

ھەر قېتىم كۆكتات سېتىۋېلىش ئالدىدا ئۆيۈمگە يېقىن ئىككى كۆكتات دۇكىنىنىڭ قايسىسىغا كىرىشتە سەل دېلىغۇل بولىمەندە، ئاخىر يەنىلا چوڭ - كىچىك ئاپتوموبىللار توختىماي ئۆتۈشۈپ تۇرغان چوڭ يولدىن مىڭ تەستە ئۆتۈپ، كۆكتاتلىرىنىڭ باھاسى يولنىڭ بۇ يېقىدىكى دۇكاندىن قىممەترەك كۆكتات دۇكىنىغا ماڭىمەن. بەزىلەر بەلكىم ھەيران بولۇپ مېنى سەل ئەخمەقمۇ نېمە دەپ ئويلاۋاتقان بولۇشى مۇمكىن. بۇنداق قىلىشىمدا ئۆزۈمگە تۇشلۇق سەۋەبىم بار، ئەلۋەتتە.

ھەر قېتىم كۆكتاتلىرى قىممەترەك بولغان دۇكانغا كىرىشىمگە، خوجايىن كۈلۈپ تۇرۇپ: ئىشتىن ئەمدى چۈشتىڭمۇ، دەپ سورايدۇ، ئاندىن سەن ئالدىرىماي تاللا، ئاخىرىدا بىراقلا ئۆلچەپ بېرەي، دەپ كۆكتات سالىدىغان خالتىنى ئېلىپ قولۇمغا بېرىدۇ، يېڭىدىن ئەكەلگەن كۆكتاتلارنى ئالاھىدە ئەسكەرتىپ قويىدۇ، بەزىدە پۇل تۆلىگەندە پارچە پۇل كەملەپ قالسا، چىقىۋەرگىن، ھېچقىسى يوق، كېيىن تەڭشىلىپ كېتىدۇ، دەيدۇ، يەنە بەزىدە بىر سىقىم ئاشكۆكى ياكى بىر باش سامساق دېگەندەك نەرسىلەرنى «سوۋغا» قىلىپمۇ قويىدۇ، قولۇمدا نەرسىلەر كۆپ بولۇپ كەتكەندە ئىشىكنى ئېچىپ بېرىشنى، ھەر قېتىم، يولدىن دىققەت قىلىپ ئۆتكىن، دېيىشنى ئۇنتۇپ قالمايدۇ. ئەمدى يەنە بىر ئەرزان كۆكتات دۇكىنىچۇ؟ ھەر قېتىم ئىشتىن چۈشۈپ، تاماق ئېتىشكە ئالدىراپ بۇ دۇكانغا كىرگىنىمدە ئىككى - ئۈچ مۇلازىمەتچىنىڭ ھېچقايسىسىنىڭ چىرايىدىن بىر ئىللىقلىق ھېس قىلمايمەن، سېسىپ كەتكەن كۆكتاتلارنى مالتىلاپ تاللاپ بولالماي، يېڭى كۆكتات يوقمۇ، دەپ سورىسىڭىز، بارى مۇشۇ، دەپلا قاراپ تۇرغىنى تۇرغان. بىر كۈنى قولۇمدا قول سومكامدىن باشقا مۇخبىرلىق سومكام، نان، بولكا دېگەندەك كۈندىلىك يېمەكلىكلەر سېلىنغان خالتىدىن باشقا يەنە پارچە سۈت قاچىلانغان سۇلياۋ خالتىمۇ بولغاچقا، كۆكتاتلارنى تاللاپ بولغۇچە شۇنداق قىينىلىپ كەتتىم، مۇشۇ ھالىتىمنى كۆرۈپ تۇرۇقلۇق، بىر مۇلازىمنىڭ كۆكتاتلارنى ئۆلچەپ بولۇپ، كۆكتاتلارنى خالتىغا سېلىپ بەرمەكتە يوق، خالتىنى ئالدىمغا تاشلاپ بەرگىنىنى كۆرۈپ، ئۆزۈمنى تۇتۇۋالالماي، قولۇمدىكى شۇنچە نەرسىلەرنى كۆرمەيۋاتامسىز ئۇكام، خاپا بولماي قاچىلاپ بەرسىڭىز بوپتىكەن، دېدىم ئاچچىقىمدا، ئۇ خالىمىغان ھالدا كۆكتاتلارنى قاچىلاپ بەردى، شۇ كۈندىن باشلاپ بۇ دۇكانغا كىرىشتىن تېخىمۇ رايىم ياندى.

يۇقىرىدا ئېيتقانلىرىم پەقەت ئىككى كىچىك كۆكتات دۇكىنىنىڭ مۇلازىمىتىدىكى ئوخشىماسلىق، خالاس. ئېچىۋاتقىنىمىز مەيلى چوڭ تاللا بازىرى بولسۇن، مەيلى مانا مۇشۇنداق كىچىك كۆكتات دۇكىنى بولسۇن ۋە مەيلى كوچا بويىدا يېيىۋالغان يايما بولسۇن، بىز پەقەت ئەلا مۇلازىمىتىمىز ئارقىلىقلا، خېرىدار جەلپ قىلالايمىز، ئەڭ مۇھىمى، «يانچۇقىمىزغا چۈشىدىغان پۇل»نىمۇ كۆپەيتەلەيمىز. مۇلازىمەت بىر خىل مەبلەغ سېلىش، يەنى «ھېسسىياتقا مەبلەغ سېلىش» ھېسابلىنىدۇ، بۇ ئارقىلىق، تېخىمۇ كۆپ خېرىدارنى جەلپ قىلغىلى، تېخىمۇ كۆپ پايدىغا ئېرىشكىلى بولىدۇ. مۇلازىمەت بىر خىل كۆرۈنمەس مۈلۈكتۇر، مۇلازىمىتىڭىز ياخشى بولسا، خېرىدار ئۆزى سىزنى ئىزدەپ كېلىدۇ.


مۇناسىۋەتلىك مەزمونلار

شىركەت ھەققىدە بىكەت ھەققىدە ئېلان مۇلازىمىتى بانكا نۇمۇرى ئالاقىلىشىڭ كىرىش

شىنجاڭ باغداش ئېلىكترون پەن-تېخنىكا چەكلىك شىركىتى

ئۈرۈمچى شەھىرى غالىبىيەت يولى ئاقتاش گۈللىكى A بىنا 1206-نۇمۇر

ئېلان ھەمكارلىق تېلفۇنى : 13999846529 , 5155117-0991

Copyright © 2005-2015 Bagdax.Cn All Rights Reserved.

备案/许可证编号:新ICP备06003611号-1

新疆巴柯达什电子科技有限公司版权所有